نصائح هامة لكل المبتدئين في العمل الحر ( اهتم واقراه كله )

مين فيكم بروفايله فى فريلانسر بقى بروفايل مفضل ( توب ) تحب تنصح المبتدئين بإيه ؟
انا الحمد لله وصلت للمرحلة دي من كام شهر في العمل من المنزل
واحب انصح كل مبتدئ بالاجتهاد وانه ميزهقش
ده شغل مش لعب
انا كنت بقدم بالاسبوعين محدش بيعبرني!
كنت ممكن اقدم 150 مرة عشان اتقبل مرة واحدة
اهتم بالنصائح دي هتبقى مية مية
1- ابعد عن الناس دي فى شغلك هتسلك وهتعيش حياة فل ( لو مبعدتش هيجيلك فلوس منهم بس نفسيتك هتتعب وهيطلع عينك فى التعامل معاهم ) : الهنود – الباكستان – البنجلاديش – الفلبينيين . ارجوك متسألش ليه دي حاجة انا عرفتها بعد معاناة كتير معاهم واى حد قديم هنا هيبقى عارف نفس المعاناة وهينصحك نفس النصيحة نفذها من غير ما تسأل وهتلاقى نفسك فى راحة بال .
2- متسألش اذاى هستقبل الفلوس وهتوصل مصر اذاى , بالفعل فى عشرات الطرق توصلك بيها فلوسك , لما يجيلك من اى موقع مبلغ مثلا 50 دولار ابقى ابتدي اسأل تاخد فلوسك اذاى .
3- لو انت لسة ربنا موفقكش وخدت اى شغلانة قدم فى اى حاجة فى اى مجال انت بتعرفه حتى لو كتابة على الوورد , وبمبالغ قليلة جدا لو حاجة بتتعمل ب 250 دولار اعملها انت ب 30 , اول تقييم مهم جدا لو خدت فيه 5 نجوم هيريحك اوي وهتبقى قطعت نص المشوار في السكة انك تتقبل فى المشاريع اللى بعد كدة
4- لو ربنا فاتحها عليك شوية اشتري العضوية اللى ب 10 دولار هتريحك كتير وهتخليك تقدم اكتر بكتير وصدقني انك تقدم كتير فرصتك هتكتر
5- خش خد امتحانات حتى لو امتحانات بسيطة زى امتحان الالة الرياضة وامتحان معلوماتك عن الموقع ( لو انت محترف هتلاقى امتحانات كتير جدا فى كل المجالات ) وامتحانات اللغة مهمة برضو . الامتحانات بتخلي فرصتك اكتر ان حد يختارك .
6 – متستناش شغل يجيلك على الميل عشان تدخل تقدم . افتح الموقع واعمل رفرش كل شوية وقدم فى كل شغل جديد ( العميل غالبا بيختار الفريلانسر اللى يشتغل معاه فى اول 10 دقايق ) موقع فريلانسر فيه خاصية جميلة انه بيطلعلك كل الشغل فى نوتفكيشن اسود بتدوس عليه يفتحلك الشغل تقدم فيه بس برضو اعمل رفرش فى صفحة الوظائف هتلاقى حاجات اكتر فى مجالات ممكن متكونش انت مقدم عليها .
7 – متعملش شغل فلوسه مش مدفوعة مقدما ( بمعنى تاني لو العميل معملش ميلستون متبدأش الشغل وفهمه ان دي قوانين وقواعد فريلانسر وان المايلستون بيضمن حقك وحقه ) .
8 – امشي عدل يحتار عدوك فيك ( بلاش شغل الشمال بتاع المصريين متحاولش تغش )
9 – خد كورسات ( اونلاين او اوفلاين ) فى المجالات اللى انت شايف انك ممكن تفهم فيها وتبقى كويس ( انسى دراستك عشان شهادتك تبلها وتشرب ميتها حتى لو واخد دوكتوراه ) .
10 – طور نفسك دايما ومتقفش فى نفس المكان اللى انت واقف فيه , فكر دايما بعد سنة هبقى ايه وخليك عامل جدول لكل خطواتك .
واخيرا ربنا يوفقكم ان شاء الله
اتمنى كل واحد يعمل بوست او تعليق يكتب فيه نصايح للناس الجديدة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *